[NP] जापानमा ड्राइभिङ्ग लाइसेन्स रूपान्तरण:गाइमेन् किरिखाए (外免切替）सम्बन्धी सम्पूर्ण मार्गदर्शिका [2025]

परिचय

तपाईं जापान आइपुग्नु भयो, र यहाँको सार्वजनिक यातायात प्रणाली अत्यन्तै प्रभावकारी भए पनि, कहिलेकाहीँ तपाईंले पुग्न चाहेको शान्त गाउँ, डाँडाकाँडा वा रमणीय दृश्यसम्म त्यो पुग्दैन। वा तपाईंले राम्रो जागिर पाउनु भयो तर त्यो कामका लागि ड्राइभिङ्ग लाइसेन्स चाहिन्छ। तब तपाईंले सोच्न थाल्नु हुन्छ — “के म जापानमा गाडी चलाउन सक्छु?”यदि तपाईं लामो समय जापान बस्ने योजना बनाउँदै हुनुहुन्छ भने, चाँडै नै अर्को प्रश्न उठ्छ — “जापानमा लाइसेन्स रूपान्तरण (外免切替) कसरी गर्ने?”तपाईं नयाँ आउनु भएको होस् वा धेरै वर्षदेखि जापानमा बस्दै आउनु भएको होस्, यो गाइडले लाइसेन्स रूपान्तरण सम्बन्धी सम्पूर्ण जानकारी एउटै ठाउँमा संकलन गर्न उद्देश्य राखेको छ। त्यसैले, सुरु गरौं सबैभन्दा आधारभूत प्रश्नबाट।

के तपाईं जापानमा विदेशी ड्राइभिङ्ग लाइसेन्सको प्रयोग गर्न सक्नुहुन्छ?

सिधा उत्तर भनेको — सक्ने सम्भावना छ।तपाईंले कुन देशबाट लाइसेन्स प्राप्त गर्नुभयो र त्यो देशको जापानसँग कस्तो सहमति छ भन्ने कुरामा निर्भर गरेर, केही फरक विकल्पहरू उपलब्ध हुन्छन् र प्रक्रियाहरू पनि फरक हुन सक्छन्।

तल जापानमा विदेशी लाइसेन्सको आधारमा गाडी चलाउने मुख्य तरिकाहरू उल्लेख गरिएको छ:

अन्तर्राष्ट्रिय ड्राइभिङ्ग परमिट (IDP) को आधारभूत जानकारी

यदि तपाईं पर्यटक वा छोटो अवधिका आगन्तुक हुनुहुन्छ भने, लाइसेन्स तुरुन्तै रूपान्तरण गर्नु आवश्यक नपर्न सक्छ।जापानले १९४९ को जेनेभा सम्मेलनमा आधारित अन्तर्राष्ट्रिय ड्राइभिङ्ग परमिट (IDP) स्वीकार गर्दछ, र यो जापान प्रवेश गरेको मितिबाट एक वर्षसम्म मान्य हुन्छ।तर, तपाईं ९० दिनभन्दा लामो भिसासहित जापानमा बसोबास गर्न थाल्नुभयो भने, IDP मात्र पर्याप्त हुँदैन।त्यसबेला लाइसेन्स रूपान्तरण (外免切替) आवश्यक बन्छ।

सिधा लाइसेन्स रूपान्तरण गर्न सकिने देशहरू

केही देशका नागरिकहरूले सरल रूपान्तरण प्रक्रियाको फाइदा उठाउन सक्छन्।यदि तपाईं बेलायत, क्यानडा, फ्रान्स, जर्मनी, अष्ट्रेलिया, स्क्यान्डिनेभिया (उत्तरी युरोपका देशहरू) वा दक्षिण कोरिया जस्ता देशहरूबाट हुनुहुन्छ भने, तपाईंले लेखित र ड्राइभिङ्ग परीक्षा दिनै पर्दैन।तर, अन्य देशका लागि भने थोरै चुनौतीपूर्ण प्रक्रिया हुन सक्छ।तर चिन्ता नलिनुहोस् — सही तयारी (जसको विवरण म तल दिनेछु) सँगै तपाईं सजिलै यो प्रक्रिया पार गर्न सक्नुहुन्छ।

गाइमेन् किरिखाए (外免切替) भनेको के हो?

“गाइमेन् किरिखाए” (外免切替) को शाब्दिक अर्थ हो — विदेशी लाइसेन्स रूपान्तरण
यो जापानको आधिकारिक प्रक्रिया हो जसअन्तर्गत वैध गैर-जापानी ड्राइभिङ्ग लाइसेन्सलाई जापानी लाइसेन्समा रूपान्तरण गर्न सकिन्छ।गाइमेन् किरिखाएले अन्य ड्राइभिङ्ग स्कूलको तुलनामा धेरै फाइदाहरू दिन्छ -यहाँसम्म कि लेखित र व्यावहारिक परीक्षा दिनुपर्नेहरूका लागि पनि।यीमध्ये केहि प्रमुख फाइदाहरू यस्ता छन्:

• महँगो ड्राइभिङ्ग स्कूल जानु नपर्ने
• सुरुबाट नयाँ लाइसेन्स लिन नपरी कानुनी रूपमा जापानमा गाडी चलाउन पाउने
• विशेषगरी ग्रामीण क्षेत्रहरूमा सजिलो आवागमन र रोजगारीको अवसर
• खर्च पनि धेरै कम पर्छ

सरल रूपान्तरण प्रक्रिया योग्य देशहरू

यदि तपाईं त्यस्ता देशबाट हुनुहुन्छ जसलाई जापानले लाइसेन्स समझदारी अन्तर्गत मान्यता दिएको छ भने, तपाईंको लागि प्रक्रिया निकै सजिलो हुन्छ।सरल रूपान्तरण प्रक्रिया योग्य देशहरू मध्ये मान्यता प्राप्त देशहरूको सूची समावेश छन्:

आइसल्यान्ड	आयरल्याण्ड
इङ्ग्ल्यान्ड	इटाली
अष्ट्रिया	अष्ट्रेलिया
नेदरल्याण्ड	क्यानाडा
दक्षिण कोरिया	ग्रिस
स्विजरल्याण्ड	स्विडेन
स्पेन	चेक गणराज्य
डेनमार्क	जर्मनी
न्यूजिल्याण्ड	नर्वे
फिनल्याण्ड	फ्रान्स
बेल्जियम	पोर्चुगल
लक्जेम्बर्ग	ताइवान

निम्न अमेरिकी राज्यहरू पनि छूट प्राप्त छन्:

• हवाई
• म्यारिल्याण्ड
• भर्जिनिया
• वासिंगटन
• ओहायो
• ओरेगन
• कोलोराडो

किन केही देशहरूमा सजिलो प्रक्रिया हुन्छ?

जापानले सडक सुरक्षा मापदण्ड र परीक्षण प्रणाली मिल्ने देशहरूसँग पारस्परिक सम्झौता (reciprocity agreement) गरेको छ। यसले गर्दा केही देशका नागरिकहरूका लागि जापानी सवारी चालक अनुमति पत्रमा रूपान्तरण (conversion) गर्नु धेरै सजिलो हुन्छ। तर जापानमा प्रक्रिया धेरै कडा मानिन्छ।

जापानमा सवारी चालक अनुमति पत्र रूपान्तरण गर्न आवश्यक कागजातहरू

तपाईं जुनसुकै देशबाट हुनुहुन्छ, जापानमा सवारी चालक अनुमति पत्र रूपान्तरण गर्नका लागि तल उल्लेखित कागजातहरू आवश्यक पर्छ:

आवश्यक कागजातहरूको सूची

• विदेशी सवारी चालक अनुमति पत्र
• अनुमति पत्रको अनुवाद (Ziplus, JAF वा अन्य प्रमाणित संस्थाबाट गरिएको)
• जापानको निवास कार्ड (在留カード / Zairyu Card)
• सवारी अनुमति पत्र जारी भएको देश वा क्षेत्रमा कम्तीमा ३ महिना बसोबास गरेको प्रमाण (उदाहरण: राहदानी, प्रवेश/प्रस्थानको प्रमाणपत्र आदि)
• राहदानी साइजको १–२ वटा फोटोजापानीको माई नम्बर कार्ड वा हालको ठेगाना देखिने कागजात (जस्तै: निवासी प्रमाणपत्र / 住民票)
• जापानीको माई नम्बर कार्ड वा हालको ठेगाना देखिने कागजात (जस्तै: निवासी प्रमाणपत्र / 住民票)

बसोबास/गाडी चलाउने इतिहास प्रमाणित गर्ने टिप्स

सवारी चालक अनुमति पत्र प्राप्त गरेपछि कम्तीमा ३ महिना सो देशमा बसोबास गरेको प्रमाण अत्यन्तै आवश्यक हुन्छ। यस प्रमाणको लागि तपाईंले तलका कागजातहरू उपयोग गर्न सक्नुहुन्छ:

• राहदानीमा लागेको आगमन/प्रस्थानको स्ट्याम्प

कागजातहरू अनुवाद गराउने तरिका

गाइमेन किरिखाए (外国免許切替) प्रक्रिया सुरु गर्न पहिलो र अनिवार्य चरण भनेको तपाईंको विदेशी सवारी चालक अनुमति पत्रको अनुवाद गराउनु हो।यो कुनै पनि देशबाट आएको व्यक्तिका लागि आवश्यक हुन्छ।

अनुवाद भनेको अनुमोदित संस्था/संस्थाबाट मात्र गरिनु पर्नेछ, जुन संस्थाले सरकारी रूपमा मान्यता प्राप्त गरेका हुन्छन्। अनुवाद शुल्क प्रायः ६,००० येनभन्दा बढी हुँदैन, र प्रक्रिया सम्पन्न हुन २–४ दिन लाग्न सक्छ।

अनुवाद कहाँ र कसरी गराउने?

हाल जापानमा सबैभन्दा धेरै प्रयोग हुने अनुवाद सेवाहरू:

• Ziplus
• JAF (Japan Automobile Federation)

यी संस्थाहरूले अनलाइन, हुलाक (post), वा फोनमार्फत पनि आवेदन लिने गर्छन्। अनुवाद र प्रमाणपत्र जारी गर्न १–२ कार्यदिन देखि लिएर २ हप्तासम्म लाग्न सक्छ, स्थान अनुसार फरक पर्न सक्छ।यी संस्थाहरूले धेरै देशहरूको अनुमति पत्र अनुवाद गर्न सक्छन्, तर सबै देशका लागि होइन। यदि तपाईंको देश सूचीमा छैन भने, तपाईंको देशको दूतावास वा कन्सुलेटमा सोधपुछ गर्नुहोस्।

सवारी चालक अनुमति पत्र रूपान्तरण (Conversion) को चरणहरू

अनुवाद प्राप्त गरेपछि, त्यो केवल “पहिलो कदम” मात्र हो। प्रक्रिया अझै बाँकी छ।धेरै विदेशी नागरिकहरूलाई लिखित परीक्षा र विशेषगरी संचालन (ड्राइभिङ) परीक्षणमा समस्या हुने गर्छ।त्योबारे पछि चर्चा गरौंला, तर यहाँ सम्पूर्ण प्रक्रिया एक नजरमा:

1. आफ्नो नजिकको सवारी चालक अनुमति केन्द्रमा अपोइन्टमेन्ट लिने
2. आवश्यक सबै कागजातहरू बुझाउने
3. आँखा परीक्षण लिने
4. लिखित परीक्षा दिने (आवश्यक भएमा)
5. प्रायोगिक परीक्षा (driving test) को तालिका मिलाउने (आवश्यक भएमा)
6. नयाँ जापानी सवारी चालक अनुमति पत्र प्राप्त गर्ने!

धेरै चरणहरू देख्दा सुरुमा अलमलमा पर्न सकिन्छ, तर हरेक चरणलाई स्पष्ट रूपमा बुझेपछि प्रक्रिया सजिलो र सीधा हुन्छ।

लेखित परीक्षा दिने बारेमा

लेखित परीक्षामा १० वटा true/false (साँचो/झूटो) प्रश्नहरू हुन्छन्, र यो प्रायः नेपाली र अंग्रेजी दुबै भाषामा पनि उपलब्ध हुन्छ। तपाईंले सुरु देखिनै दिनु पर्ने परीक्षा भन्दा यो धेरै छोटो हुन्छ। यदि तपाईंले सम्बन्धित अध्ययन सामग्रीबाट केही समय तयारी गर्नुभयो भने यो परीक्षा धेरै गाह्रो हुँदैन। तर ध्यान दिनुहोस्—के कुरा ‘सामान्य ज्ञान’ हो भन्ने कुरा देश अनुसार फरक हुन सक्छ, र जापानी ट्राफिक नियमसँग सम्बन्धित विशेष विषयहरू पनि सोधिने सम्भावना हुन्छ।

*महत्वपूर्ण जानकारी:सन् २०२५ अक्टोबर १ देखि लेखित परीक्षामा ५० वटा प्रश्न हुनेछन् र पास हुनको लागि कम्तीमा ४५ प्रश्न सही हुनुपर्नेछ!

सामान्य गल्तीहरू र सुझावहरू

लेखित परीक्षा तपाईंले सामना गर्ने सबैभन्दा ठूलो चुनौती नहुन सक्छ, तर केही सामान्य गल्तीहरूबाट जोगिन सक्नु सधैं फाइदाजनक हुन्छ। तल केही सुझावहरू दिइएका छन्:

• आधिकारिक सामग्री वा विदेशमा बसोबास गर्ने ब्लगहरूबाट अध्ययन गर्नुहोस्
• प्रश्नहरूमा प्रयोग भएका “double negative” (दुईवटा नकारात्मक शब्द) हरूप्रति सतर्क रहनुहोस्
• जापानी ट्राफिक नियमसँग सम्बन्धित विशेष/अलि अनौठो लाग्ने कुराहरू राम्रोसँग याद गर्नुहोस्

जापानको प्रायोगिक (Practical) ड्राइभिङ्ग टेस्ट

वास्तविक जीवनमा गाडी चलाउने जस्तो नभई, यो टेस्ट एक बन्द ट्र्याक (closed circuit) मा हुन्छ, जहाँ तीखा मोडहरू, S-आकारका मोडहरू, र अचानक देखिने stop संकेतहरू जस्ता चुनौतीहरू हुन्छन्। मूल्याङ्कनको क्रममा तपाईंले करिब २ किलोमिटरको दूरी पूरा गर्नुपर्ने हुन्छ।

पहिलो प्रयासमै पास हुने केही सुझावहरू

• अघिनै सिग्नल दिन (३ सेकेन्ड अगाडि नियम सम्झनुहोस्!)
• ऐना (mirrors) जाँच गर्नुहोस् र प्रत्येकपटक काँध माथि हेर्न नबिर्सनुहोस्
• Stop sign मा पूर्ण रूपमा रोकिनुहोस् (हो, पूरै रोकिनु आवश्यक छ)
• हतार नगर्नुहोस्; आत्मविश्वास र शान्तता नै सफलता ल्याउँछ

Fast-Track Package अन्तर्गत पाइने हाम्रो पाठ्यपुस्तक Road Ready in Japan मा विस्तृत सुझावहरू र बच्नुपर्ने सामान्य गल्तीहरूको सूची उपलब्ध छ।

यदि तपाईंको देश “मान्य देश” को सूचीमा छैन भने?

यदि तपाईंको देश जापानको simplified conversion को सूचीमा छैन भने पनि चिन्ता नलिनुहोस्—यसको मतलब तपाईंले केही अतिरिक्त चरणहरू पार गर्नुपर्ने हुन्छ। तपाईंले लेखित परीक्षा र प्रायोगिक ड्राइभिङ्ग टेस्ट दुबै दिनुपर्ने हुन्छ, जसमा प्रायोगिक टेस्टलाई धेरैले सबैभन्दा गाह्रो मान्ने गर्छन्।

कहिलेकाहीँ, तपाईंलाई आफ्नो driving history (गाडी चलाएको विवरण) दिनुपर्ने हुन सक्छ, वा दूतावासमार्फत तपाईंको लाइसेन्सको वैधता र उत्पत्ति प्रमाणित गर्न भनिने पनि हुन सक्छ।
आफ्नो नजिकको लाइसेन्स केन्द्रमा सम्पर्क गरी तपाईंको नागरिकता अनुसार आवश्यक पर्ने कागजातहरूको विस्तृत जानकारी लिनुहोस्।

तालीम र तयारी

धेरैजसो विदेशीहरू (expats) ले जापानी ड्राइभिङ्ग स्कूलमा केही क्लासहरू लिने रोजाइ गर्छन्, ताकि स्थानीय नियमहरू र ड्राइभिङ्ग टेस्टको ट्र्याकसँग परिचित हुन सकियोस्। यो अनिवार्य त होइन, तर बारम्बार परीक्षण दिनुपर्ने अवस्था (र त्यससँगै आउने लामो पर्खाइ) बाट बच्नको लागि यो एक समझदारीपूर्ण निर्णय हो।

सामान्य चुनौतीहरू र तिनीहरू पार गर्ने उपायहरू

धेरैजसो लाइसेन्स केन्द्रका कर्मचारीहरू केवल जापानी भाषा बोल्छन्। लाइसेन्स केन्द्रहरूमा अंग्रेजी सहयोग (English support) उपलब्ध हुँदैन, त्यसैले तपाईंले साथी, अनुवादक लिएर जानु बुद्धिमानी हुन्छ।

नेभिगेसन र तालिकाकरण सम्बन्धी समस्या

ड्राइभर लाइसेन्स केन्द्रहरू प्रायः ठूला शहरका केन्द्रहरूबाट टाढा हुने गर्दछन्। अपोइन्टमेन्टहरू चाँडै भरिन्छन् र पर्खाइ लामो हुन्छ, त्यसैले पहिले नै योजना बनाउनुहोस्, र अनलाइन वा फोनबाट चाँडै बुक गर्नुहोस्।

त्यसैगरी, तपाईंले पुरै एक दिनको समय छुट्याउनुहोस्, जस्तै तपाईं भिसा नविकरण गर्न वा नगर कार्यालय (city hall) मा काम गर्न जाने बेला गर्नुहुन्छ।

समय अवधि र लाग्ने खर्च

माथि उल्लेख गरिएका सम्पूर्ण जानकारीहरू पढेपछि, तपाईंलाई अब लागेको हुन सक्छ—कति समय लाग्छ र कति खर्च पर्छ? जापानी प्रशासनिक प्रक्रिया (paperwork) अनुसार यो प्रक्रिया धेरै जटिल भने होइन, तर अनुवाद आदेश दिने दिनदेखि जापानी ड्राइभर लाइसेन्स हातमा पर्ने दिनसम्म करिब ६ महिनासम्मको समय लाग्ने अनुमान गर्नुपर्छ।

तल प्रत्येक चरणमा लाग्ने अनुमानित समय तालिका दिइएको छः

चरणहरू	अनुमानित समय
पहिलो अपोइन्टमेन्ट बुक गर्नु	२ देखि ४ महिना
कागजात प्रमाणिकरण र लेखित परीक्षा	१ दिन (कहिलेकाहीँ ढिलाइ हुन सक्छ)
ड्राइभिङ्ग टेस्टको मिति तोक्नु	३ देखि ४ महिना
लाइसेन्स प्राप्त गर्नु	सोही दिन वा १–२ हप्ताभित्र

जापानी लाइसेन्स रूपान्तरणको लागत

लाइसेन्स रूपान्तरण (conversion) गर्नु हालको अवस्थासम्म सबैभन्दा सस्तो विकल्प हो, तर प्रक्रियाका विभिन्न चरणहरूमा तपाईंले स-साना शुल्कहरू तिर्नुपर्ने हुन्छ। तपाईं कुन विकल्प रोज्नुहुन्छ भन्ने आधारमा खर्च फरक पर्न सक्छ।

टोक्योमा लाग्न सक्ने अनुमानित खर्चहरू:

• लाइसेन्स अनुवाद: ¥3,000 – ¥6,000
• आवेदन शुल्क: ¥2,500
• लेखित परीक्षा शुल्क: ¥1,500
• ड्राइभिङ्ग टेस्ट (यदि आवश्यक पर्‍यो भने): ¥2,000 – ¥3,000
• फोटो र प्रशासनिक शुल्कहरू: ¥1,000
• परीक्षा तयारी सामग्री: ¥6,000 – ¥20,000
• ड्राइभिङ्ग कक्षा: ¥40,000 – ¥60,000 (कति कक्षा लिने भन्नेमा निर्भर)

कुल खर्च:प्रक्रियाको लागि करिब ¥7,000 – ¥12,000
यदि तपाईंले तयारी सामग्रीहरू पनि लिनुभयो भने करिब ¥110,000 – ¥120,000 सम्म पर्न सक्छ।तपाईंलाई तयारी सामग्री महँगो लाग्न सक्छ, तर पहिलो प्रयासमै पास गर्नका लागि यो लगानी सार्थक हुन्छ।
विदेशीहरूका लागि ड्राइभिङ्ग टेस्टको पास दर २०% भन्दा कम रहेको छ, र यसका पछाडि मुख्य कारण नै अपर्याप्त तयारी हो।त्यसको विपरित, यदि तपाईं driving camp मा जानुहुन्छ भने कम्तिमा ¥210,000 सम्मको खर्च लाग्छ।

जापानी ड्राइभर लाइसेन्स नविकरण (Renewal) गर्ने प्रक्रिया

अनि अन्ततः तपाईंको थाकेको हातमा जापानी ड्राइभर लाइसेन्स आयो। धेरै संघर्ष पार गर्नुभयो है तपाईंले! अब यो भागमा म तपाईंलाई लाइसेन्स कसरी कायम राख्ने र कति समयको अन्तरालमा नविकरण गर्नुपर्ने बारे जानकारी दिनेछु।

• पहिलो पटक प्राप्त गरिएको लाइसेन्स: ३ वर्षको लागि मान्य
• सामान्य नविकरण: हरेक ५ वर्षमा (केही केसहरूमा ३ वर्ष)
• लाइसेन्स सकिनु १ महिना अगाडि तपाईंलाई सूचना प्राप्त हुनेछ

नजिकको लाइसेन्स केन्द्रमा जानुहोस्—तपाईंको हालको लाइसेन्स, マイナンバー (My Number) कार्ड, र फोटो लिएर।यदि तपाईंको पहिलो नविकरण हो वा ट्राफिक उल्लङ्घन (violations) भएको छ भने छोटो कक्षा (lecture) सुन्नुपर्ने हुन सक्छ।

ठेगाना वा व्यक्तिगत जानकारी अपडेट गर्नु

यदि तपाईंले स्थान परिवर्तन गर्नुभयो भने ठेगाना अपडेट गर्नु कानुनी रूपमा अनिवार्य हुन्छ।
तपाईंको लाइसेन्स र बसोबास कार्ड (residence card) लिएर नजिकको प्रहरी चौकी (police station) वा लाइसेन्स केन्द्रमा जानुहोस्।

अनुभवी विदेशीहरूले दिएका सुझावहरू

अब तपाईंले मबाट धेरै कुरा थाहा पाउनुभयो। म भरपर्दो व्यक्ति भए तापनि, केवल मेरो कुरामा मात्र निर्भर हुनु आवश्यक छैन।हाम्रो सेवाबाट लाइसेन्स रूपान्तरण प्रक्रिया पूरा गरेका केही ग्राहकहरूको अनुभव तल दिइएको छः

• “लेखित परीक्षा मैले सोचेभन्दा सजिलो थियो, तर ड्राइभिङ्ग टेस्ट निकै कडा थियो। हरेक head check (काँध हेर्ने) को हर्कत देखिने गरी गर्नु नबिर्सनु!”– सारा, फ्लोरिडा
• “मैले दुई पटक असफल भएपछि मात्रै केही कक्षा लिएर परीक्षणका लागि आवश्यक विशेष प्रविधि सिक्नुपर्छ भन्ने बुझेँ। त्यो कक्षा लिएको एकदमै फाइदाजनक भयो।”– चिहारू, क्यालिफोर्निया
• “सबै कागजातहरू सटिक रूपमा लिएर गएको थिएँ, त्यो धेरै काम लाग्यो। उनीहरूले मेरो तयारीको प्रशंसा गरे।”– लेना, जर्मनी

पहिले नै थाहा पाएको भए राम्रो हुन्थ्यो

जब हामीले उनीहरूसँग अन्तर्वार्ता लियौं, तब हामीले यो पनि सोध्यौं कि कस्ता कुरा पहिले नै थाहा पाएको भए सजिलो हुनेथियो भन्ने महसुस उनीहरूले गरे। तल तीनवटा सबैभन्दा सामान्य उत्तरहरू उल्लेख गरिएको छ जुन हाम्रा ग्राहकहरूले बताए:

• अगाडिनै अपोइन्टमेन्ट हप्तौं, कहिलेकाहीँ महिनौं अघिदेखि बुक गरिन्छ भन्ने थाहा पाएको भए।
• “आफ्नो देशमा जस्तो गाडी चलाउने बानी यहाँ लागू हुँदैन” भन्ने बुझ्न जरुरी थियो।
• विश्वासी चालकहरूलाई समेत परीक्षण मार्गमा अभ्यास नगरी गाडी चलाउन गाह्रो हुन सक्छ, किनभने यहाँको नियमहरू धेरै विशेष र कडा छन्।

वैकल्पिक उपाय: जापानी लाइसेन्स नयाँ रूपमा लिनुहोस्

यदि तपाईंको विदेशी ड्राइभिङ लाइसेन्स जापानमा रूपान्तरण योग्य छैन, वा सकिएको छ, वा धेरै वर्ष पहिले मात्र लिएको हो र तपाईंले प्रायः गाडी चलाउने अभ्यास गर्नुभएको छैन भने, जापानी ड्राइभिङ स्कूलमा सहभागी हुनु नै तपाईंको एक मात्र विकल्प हुन सक्छ।

जापानमा नयाँ लाइसेन्स लिन दुई मुख्य विकल्पहरू छन्:
पहिलो, सामान्य ड्राइभिङ कक्षा, जुन सबैभन्दा लचिलो विकल्प हो तर समय र खर्चको हिसाबले धेरै लाग्ने विकल्प हो।
दोस्रो, ड्राइभिङ क्याम्पमा सहभागी हुने, जहाँ तपाईं दुई हप्तासम्म स्कूलले प्रदान गरेको होटेल/आवासमा बस्दै दैनिक रुपमा अध्ययन गर्नुहुन्छ।यदि तपाईं सटिक रूपमा समय छुट्याउन सक्नुहुन्छ भने, यो विधि सबैभन्दा राम्रो मानिन्छ।

ड्राइभिङ स्कूलहरू र पाठ्यक्रम

स्कूलहरूले म्यानुअल र अटोमेटिक दुवै प्रकारका कोर्सहरू प्रदान गर्छन्। अध्ययन सामग्री प्रायः जापानी भाषामा हुन्छ (कहिलेकाहीं अङ्ग्रेजीमा पनि उपलब्ध हुन्छ)। तपाईंले निम्न कार्यहरू गर्नु पर्ने हुन्छ:

• कक्षामा उपस्थित हुनु
• स्कूलभित्रै लिइने विभिन्न परीक्षा पास गर्नु
• ¥250,000 देखि ¥350,000 सम्मको शुल्क तिर्नु

यद्यपि यो महँगो देखिन्छ, तर जापानी लाइसेन्स प्राप्त गर्नका लागि सबैभन्दा भरपर्दो उपाय यही मानिन्छ।

उपयोगी स्रोतहरू र सम्पर्कहरू

तपाईंको प्रक्रिया सुरु गर्नका लागि केही उपयोगी लिङ्क र सेवा विवरणहरू:

• Ziplus लाइसेन्स रूपान्तरण सेवा
• JAF (Japan Automobile Federation) अनुवाद सेवा

यी सेवाहरूले तपाईंको विदेशी लाइसेन्सको अधिकारिक अनुवाद प्रदान गर्छन्।JAF ले धेरै देशहरूलाई समर्थन गर्छ, तर Ziplus ले लाइसेन्स प्रशिक्षण र परीक्षण तयारी सामग्रीहरू पनि उपलब्ध गराउँछ।

जापानमा लाइसेन्स रूपान्तरण सम्बन्धी बारम्बार सोधिने प्रश्नहरू (FAQs)

प्रश्न 1: के म जापानको स्थायी बासिन्दा नबनीकन लाइसेन्स रूपान्तरण गर्न सक्छु?
जवाफ: हुँदैन। लाइसेन्स रूपान्तरणको लागि तपाईं जापानको कानुनी बासिन्दा हुनु अनिवार्य छ।

---

प्रश्न 2: यदि म म्याद सकिएको अन्तर्राष्ट्रिय ड्राइभिङ परमिट (IDP) लिएर गाडी चलाएँ भने के हुन्छ?
जवाफ: यो अनधिकृत गाडी चलाएको मानिन्छ, जसले जरिवाना, लाइसेन्स निलम्बन, वा देशबाट निकाला जस्ता गम्भीर परिणामहरू निम्त्याउन सक्छ।

---

प्रश्न 3: के JAF बाहेक अन्य अनुवाद सेवाहरू प्रयोग गर्न मिल्छ?
जवाफ: हो, केही दूतावासहरूले मान्य अनुवाद सेवा प्रदान गर्छन्। तर, कृपया पहिले आफ्नो लाइसेन्स सेन्टरमा पुष्टि गर्नुहोस्।

---

प्रश्न 4: रूपान्तरण गरिएको लाइसेन्स कति समयसम्म मान्य हुन्छ?
जवाफ: सामान्यतः ३ देखि ५ वर्षसम्म, तपाईंको उमेर र जापानमा भएको ड्राइभिङ इतिहास अनुसार।

---

प्रश्न 5: यदि मैले व्यावहारिक परीक्षा धेरै पटक फेल गरेँ भने के हुन्छ?
जवाफ: तपाईंले लेखित परीक्षा पास गरेपछि ६ महिनाभित्र ड्राइभिङ टेस्ट पास गर्नुपर्छ। यदि त्यो समयभित्र पास गर्न सक्नुभयो भने, तपाईंलाई सम्पूर्ण प्रक्रिया फेरि सुरु गर्नु पर्ने हुन्छ।
त्यसैगरी, हरेक पुन: परीक्षा शुल्क लाग्छ, र सबैभन्दा महत्वपूर्ण कुरा — समय पनि खर्च हुन्छ, त्यसैले राम्रोसँग अभ्यास गर्नुहोस्।

---

प्रश्न 6: के जापानी लाइसेन्स अन्तर्राष्ट्रिय रूपमा मान्य हुन्छ?
जवाफ: हो, तपाईंले जापानी लाइसेन्स प्राप्त गरेपछि अन्तर्राष्ट्रिय ड्राइभिङ परमिट (IDP) को लागि आवेदन दिन सक्नुहुन्छ।

निष्कर्ष

जापानमा लाइसेन्स रूपान्तरण गर्नु त्यति गाह्रो छैन।हो, प्रणाली केही ब्युरोक्र्याटिक छ, र ड्राइभिङ टेस्ट कठिन मानिन्छ। तर हरेक वर्ष हजारौं विदेशीहरूले यो प्रक्रिया सफलतापूर्वक पूरा गर्छन्, र यदि तपाईंले सही तयारी गर्नुभयो भने पहिलो प्रयासमै पास गर्न सक्नुहुन्छ!